¹⁰ĉuvaŝ/o

Ano de tjurka etno el la regiono de meza Volgo: ĉuvaŝoj parolas la ĉuvaŝan lingvon kaj estas ortodoksaj kristanoj kun kelkaj paganaj tradicioj [1]; nur genetikaj studoj klarigos al ni, kiom da mariaj antaŭuloj havas la hodiaŭaj ĉuvaŝoj [2].

Rilata al ĉuvaŝoj, ilia lando, lingvo, kulturo: en la kultura programo antaŭvideblas ĉuvaŝa vespero kun prezento de folklora ĉuvaŝa grupo [3]; niaj gastoj povis vesti sin per ĉuvaŝaj naciaj vestaĵoj kaj manĝi ĉuvaŝajn bongustaĵojn [4]; el la ogura branĉo (en kiu parolis parto de la avaroj, regintaj Panonion en la 6a kaj 7a jarcentoj, de la prabulgaroj, konkerintaj la sudan basenon de Danubo en la 7a jarcento, kaj de la ĥazaroj, regintaj la ponto-kaspiajn stepojn inter la 7a kaj la 10a jarcentoj) nuntempe nur la ĉuvaŝa lingvo estas parolata [5].

Aŭtonoma respubliko de Ruslando ĉe Volgo: Internacia Lingvo-Festivalo […] estiĝis en la Fakultato pri Fremdaj Lingvoj […] en Ĉeboksari, ĉefurbo de Ĉuvaŝujo [6].