³intervju/o ^JED

(tr)

Pridemandi iun pri vivo, opinioj kaj similaj por posta, ofte publika raporto: mia koro bategis, kiam mi eniris oficejon kaj intervjuis […] direktorojn [1]; la observanto de UEA estis plurfoje intervjuita [2]; ŝajnis al mi, ke la intervjuanto ne estas justa [3]; la realaj nomoj de la intervjuatoj estis ŝanĝitaj [4]; mi tuj iru al Stokholmo por intervjui nian agenton en tiu urbego [5]; imamo de roterdama moskeo estis intervjuita televide [6]. enketi

Interparolo konsistanta el demandoj kaj respondoj pri ies vivo, agoj aŭ opinioj por raporto: „pri kelkaj problemoj de interlingvistiko“ estas surpaperigo de intervjuo kun la franca lingvisto André Martinet [7]; [li] penis koncentri sian tutan atenton pri la intervjuo, kiun li intencas havi kun la fratoj de la plej bela el ĉiuj virinoj [8]; mi vizitis ŝin, sed la intervjuo ne liveris interesajn detalojn [9]. enketo

(ntr)

Respondi al demandoj de intervjuo: ĉu vi venas […] al nia ĉefsidejo por intervjuiĝi? [10].

Iu, kiu profesie intervjuas: en la elsendo aŭdeblis la bona interkompreno inter Martin, Uriel kaj la intervjuistino [11].

Intervjuo per kiu proponanto de laboro esploras la pretecon de kandidato: imagu, kion mi aŭdis dum dungintervjuo: „ĉu vi havas sperton?” „jes, multan, jam 50 intervjuojn.” [12]; mi sukcesis pri la unua laborintervjuo [13].